Dünya Bankı Azərbaycan iqtisadiyyatının artım proqnozunu dəyişməz saxlayıb
Dünya Bankı Azərbaycanın ÜDM-nin 2025-ci ildə 2,7 %, 2026-cı ildə isə 2,4 % artacağını proqnozlaşdırır.
Bu barədə bankın "Qlobal İqtisadi Perspektivlər" hesabatının yanvar buraxılışında qeyd olunub.
Dünya Bankının proqnozları oktyabr qiymətləndirmələri ilə müqayisədə dəyişməz qalıb. Hesabata görə, 2024-cü ildə Azərbaycan iqtisadiyyatı 4 % artıb ki, bu da 2023-cü ilin 1,1 %-lik göstəricisindən xeyli yüksəkdir.
Bankın proqnozlarına görə, Cənubi Qafqaz ölkələrinin ümumi ÜDM artımı 2025-ci ildə 3,9 % (oktyabr proqnozundan 0,2 faiz bəndi çox), 2026-cı ildə isə 3,4 % səviyyəsində olacaq.
Dünya Bankı qeyd edir ki, qlobal iqtisadiyyat üçün risklər azalma istiqamətində qalır. Bank əsas təhdidlər arasında geosiyasi gərginliyi, xüsusilə də Ukraynada münaqişə ilə bağlı qeyri-müəyyənliyin Avropa və Mərkəzi Asiya (ECA) regionunun iqtisadi perspektivlərinə təzyiq göstərməyə davam etdiyini qeyd edib.
Dünya Bankı, növbəti risk kimi ECA ölkələrində ticarət məhdudiyyətlərinin artmasını qeyd edir. 2024-cü ilin əvvəlindən burada 585-dən çox məhdudlaşdırıcı tədbir tətbiq edilib ki, bu da proteksionizmi gücləndirir və ticarət fəaliyyətini azaldır.
Hesabat müəlliflərinin fikrincə, inflyasiya riskləri xidmətlərin dəyərinin artması, enerji resurslarından asılılıq və dezinflyasiyanın gecikmələri ilə bağlıdır.
Regionda hərbi xərclər artaraq 2023-cü ildə ÜDM-in 4 %-nə çatıb ki, bu da 2010-2021-ci illərin orta göstəricisindən iki dəfə çoxdur. "Artım xüsusilə müdafiə xərclərinin ÜDM-in təxminən üçdə birini təşkil etdiyi Ukraynada və Rusiyada nəzərə çarpır", - hesabatda qeyd olunur.
Dünya Bankı hesab edir ki, Mərkəzi Asiya və Cənubi Qafqaz iqtisadiyyatları Rusiyadan pul axınının azalmasına qarşı həssas olaraq qalır. Məsələn, Tacikistanda pul köçürmələri ÜDM-in təxminən 40 %-ni təşkil edir ki, bu da ölkəni Rusiyadakı iqtisadi vəziyyətdən xüsusilə asılı edir.
"İqlim dəyişikliyi ilə bağlı risklər ECA regionu üçün ciddi problem olaraq qalır. Əhalinin təxminən 21 %-i quraqlıq təhlükəsinə məruz qalır ki, bu da dünyada ən yüksək göstəricilərdən biridir", - hesabatda deyilir.
Qeyd edək ki, Azərbaycan İqtisadiyyat Nazirliyi ölkənin ÜDM-nin 2025-ci ildə 3,5 %, 2026-cı ildə isə 2,8 % artacağını proqnozlaşdırır. Eyni zamanda, Dövlət Statistika Komitəsinin məlumatına görə, 2024-cü ildə ölkənin ÜDM-i 4,1 % artıb. (report)
22:08 16.01.2025
Oxunuş sayı: 16759
