Zelenski-Tramp görüşü üçün hazırlıq işləri görülür
Kiyev və Vaşinqton artıq Volodimir Zelenski ilə Donald Tramp arasında ABŞ-ın 47-ci Prezidentinin andiçmə mərasimindən sonra baş tutacaq görüşlə bağlı hazırlıq işləri görür.
Bu barədə Ukrayna Prezidenti Volodimir Zelenski Polşanın Baş naziri Donald Tuskla keçirdiyi brifinqdə bildirib.
“Əlbəttə, inoqurasiyadan sonra. Artıq komandalarımız qarşıdan gələn görüşün məzmunu və formatı üzərində işləyir. Biz orada əsas məsələləri müzakirə edəcəyik, mən onlar haqqında ətraflı danışmayacağam - hələ tezdir”, - deyə dövlət başçısı bildirib.
Zelenskinin sözlərinə görə, Ukrayna üçün prioritet müharibəyə ədalətli şərtlərlə son qoymaqdır. “Güclü təhlükəsizlik zəmanətləri almaq vacibdir. Bu gün isə strateji zəmanətlər arasında Avropa İttifaqına (Aİ) və NATO-ya daxil olmaq, orduya silahla dəstək göstərmək daxildir”, - deyə o, qeyd edib. (trend)
03:14 16.01.2025
Oxunuş sayı: 12181
