DİM təltif olunub
Yanvarın 15-də Dövlət İmtahan Mərkəzində (DİM) Niderlandın İmtahan və Sertifikatlaşdırma üzrə Tədqiqat Mərkəzi (RCEC) tərəfindən aparılan təkrar auditin nəticələrinə və buna əsasən DİM-ə fəaliyyəti ilə bağlı uyğunluq sertifikatının təqdim olunmasına həsr edilmiş tədbir keçirilib.
Dövlət İmtahan Mərkəzinin İdarə Heyətinin sədri Məleykə Abbaszadə RCEC təşkilatı tərəfindən aparılan təkrar auditin əsas məqsədinin DİM-in Keyfiyyət İdarəetmə Sisteminin qiymətləndirilməsi ilə yanaşı, auditin nəticələrinə əsaslanaraq sisteminin effektivliyinin daha da artırılması olduğunu qeyd edib. Audit zamanı DİM-in fəaliyyəti və iş prinsipləri beynəlxalq standartlara uyğunluq baxımından yüksək qiymətləndirilib. Məleykə Abbaszadə bildirib ki, auditin nəticəsi DİM-in fəaliyyətində innovativ yanaşmaları və müasir idarəetmə sistemlərini tətbiq etdiyini və dövrün çağırışlarına əsasən fəaliyyət göstərdiyini bir daha sübut edir.
Tədbir zamanı RCEC tərəfindən həyata keçirilmiş təkrar audit prosesinin əsaslandığı yoxlama sistemi, audit prosesinin əhatə etdiyi imtahanlar, prosesə cəlb olunan struktur bölmələr və audit meyarlarına əsasən yekun nəticələr barədə iştirakçılara ətraflı məlumat verilib.
RCEC təşkilatının direktoru Jan Arnold Brauer bildirib ki, DİM-in Keyfiyyət İdarəetmə Sisteminin təkrar auditinin uğurla tamamlanması mühüm bir nailiyyətdir. O qeyd edib ki, bu audit yalnız qurumun yüksək keyfiyyət standartlarına riayət etdiyini təsdiqləmir, həmçinin imtahan prosesində ədalət, etibarlılıq və mükəmməlliyə sadiqliyini də nümayiş etdirir. RCEC təşkilatının yüksək standartların tələblərinə olan bağlılığı təkcə Azərbaycandakı təhsilin inkişafına kömək etmir, eyni zamanda, regionda və dünyada digər qurumlar üçün də əla nümunədir.
Sonda Brauer audit prosesinin nəticəsi olaraq, RCEC təşkilatının 3 il etibarlılığı olan uyğunluq sertifikatını Məleykə Abbaszadəyə təqdim edib.
Qeyd edək ki, 2008-ci ildən fəaliyyət göstərən Niderland Krallığının İmtahan və Sertifikatlaşdırma üzrə Tədqiqat Mərkəzi imtahan keçirən təşkilatların keyfiyyət idarəetmə sisteminin auditi prosesini həyata keçirir. DİM-in fəaliyyətinin RCEC tərəfindən ilk dəfə auditi 2020–2021-ci illərdə aparılıb və DİM 2021-ci ildə RCEC-nin 3 il etibarlılığı olan uyğunluq sertifikatı ilə də təltif olunub. (azertac)
12:09 15.01.2025
Oxunuş sayı: 5807
