“WhatsApp”da yenilik: Süni intellekt şəxsiyyəti ilə söhbət
2024-cü ilin iyul ayında Meta, “WhatsApp”da süni intellekt dəstəyi ilə xüsusi chatbot-ların yaradılması üçün “AI Studio” xüsusiyyətini sınaqdan keçirməyə başlamışdı. İstifadəçilərin müxtəlif süni intellekt şəxsiyyətləri ilə qarşılıqlı əlaqə qurmasına imkan verən bu xüsusiyyət mərhələli şəkildə istifadəyə verilmişdi. İndi isə “WhatsApp bu xüsusiyyəti daha əlçatan etmək məqsədilə tətbiqə xüsusi Süni İntellektlər (“AI”) tabı əlavə etməyə hazırlaşır.
Android üçün “WhatsApp Beta” 2.25.1.24 versiyasında “Communities” tabının yerini alacaq yeni “AI” tabı, süni intellekt botlarını istifadəçilərə daha açıq şəkildə təqdim edəcək. Vizuallara əsasən, bu tabda populyar, təklif və bağlantı, pop mədəniyyəti, anime kimi müxtəlif kateqoriyalara ayrılmış süni intellekt avatarları olacaq. İstifadəçilər bu tabdan istədikləri süni intellekt şəxsiyyətini seçərək söhbətə başlaya biləcəklər.
Bu yeni tabın istifadəçilərə öz süni intellekt avatarlarını yaratmağa imkan verib-verməyəcəyi ilə bağlı məlumat verilməyib. Lakin bu seçim “Instagram”dakı “AI Studio” menyusunda mövcuddur. “WhatsApp”a gələcək olan bu xüsusiyyətin təfərrüatlarının yaxın zamanda daha aydınlaşması gözlənilir.
Meta-nın bu dəyişikliklə “WhatsApp” istifadəçilərini süni intellekt inteqrasiyasını daha çox sınamağa təşviq etməyi hədəflədiyi düşünülür. “Instagram”-da böyük təsir yaratmayan bu yeniliyi “WhatsApp” istifadəçilərinin necə qarşılayacağı maraqla gözlənilir.
Nərgiz Camalzadə
12:53 10.01.2025
Oxunuş sayı: 18303
