“İordaniya-Azərbaycan Mədəniyyət və Dostluq Cəmiyyəti” iki ölkə arasında münasibətlərin möhkəmlənməsində mühüm rol oynayacaq
Əmman şəhərində yeni təsis edilmiş “İordaniya-Azərbaycan Mədəniyyət və Dostluq Cəmiyyəti”nin açılış mərasimi keçirilib.
Azərbaycanın İordaniyadakı səfirliyindən əldə olunan məlumata görə, iki qardaş ölkə arasında münasibətlərin möhkəmlənməsi və dərinləşməsinə töhfə vermək istəyən bir qrup nüfuzlu ictimai-siyasi xadimin təşəbbüsü ilə təsis edilən Dostluq Cəmiyyətin idarə heyətində İordaniya parlamentinin hazırkı və sabiq deputatları, yerli idarəetmə orqanlarının rəsmiləri, nüfuzlu siyasi şəxsiyyətlər və biznesmenlər yer alır.
Cəmiyyətin fəxri prezidenti, İordaniyanın keçmiş Baş naziri, Beynəlxalq Ədalət Məhkəməsinin keçmiş hakimi Aun Xasaunə tədbirdə çıxış edərək yeni yaradılan cəmiyyətin dostluq əlaqələrinin hərtərəfli möhkəmləndirilməsini, xüsusən iki ölkə arasında dərin humanitar, iqtisadi və mədəni əlaqələrin inkişaf etdirilməsini özünə əsas hədəf seçdiyini bildirib və bunun ikitərəfli əlaqələrə xüsusi töhfə verəcəyinə əminliyini ifadə edib.
Cəmiyyətin idarə heyətinin sədri Amer Əbu Obeid bildirib ki, “İordaniya-Azərbaycan Mədəniyyət və Dostluq Cəmiyyəti”nin bir sıra proqramı və təklifləri var. Cəmiyyət onları iki qardaş ölkənin mənafeyinə uyğun olaraq həyata keçirmək, dostluq və əməkdaşlıq əlaqələrinin daha da inkişaf etdirilməsində körpü rolunu oynamaq istəyir.
Tədbirdə çıxış edən Azərbaycan Respublikasının İordaniya Haşimilər Krallığındakı səfiri Eldar Səlimov ölkəmizlə İordaniya arasında əlaqələrin yüksələn xətlə inkişaf etdiyini, dövlət başçılarımız arasındakı dostluq münasibətlərinin bütün sahələrdə əməkdaşlığın inkişafı üçün geniş zəmin yaratdığını bildirib. Qeyd olunub ki, iki ölkə arasında humanitar, iqtisadi və mədəni əlaqələrin daha da inkişafına xüsusi töhfə verəcək yeni dostluq cəmiyyətinin təsis edilməsi məmnunluq doğurur.
“İordaniya-Azərbaycan Mədəniyyət və Dostluq Cəmiyyəti”nin yaradılmasında əməyi olan şəxslərə təşəkkürünü bildirən E.Səlimov cəmiyyətin səmərəli fəaliyyətinin təmin edilməsi üçün səfirliyin lazımi dəstək göstərməyə hazır olduğunu vurğulayıb.
Məlumat üçün bildiririk ki, “İordaniya-Azərbaycan Mədəniyyət və Dostluq Cəmiyyəti” ötən il dekabrın 23-də İordaniya Haşimilər Krallığı Sosial İnkişaf Nazirliyində müvafiq qeydiyyatdan keçmişdir.(Azərtac)
11:34 09.01.2025
Oxunuş sayı: 8385
