İsfahanda yaşayan ermənilər Miladı qeyd ediblər
İranın İsfahan şəhərinin Yeni Culfa hissəsində yaşayan ermənilər Yeni ili qarşılayırlar və milad bayramını qeyd edirlər.
Ermənilər buraya Naxçıvanın Culfa şəhərindən 1604-cü ildə şah I Abbas (böyük Abbas) tərəfindən köçürülüblər. Tezliklə əlverişli yerdə yerləşmələrindən istifadə edərək Çin və Hindistanla ticarəti öz əllərinə alıblar. İranda ilk mətbəə də məhz burada, 1636-cı ildə ermənilər tərəfində yaradılıb və erməni dilinin qorunub saxlanılmasında önəmli rol oynayıb. Burada erməni kilsəsi fəaliyyət göstərir. Səfəvilər dövləti erməni kilsəsinə muxtariyyət verib. Kilsə öz statusunu və muxtariyyətini Qacarlar, şah rejimi və hazirki molla rejimi dövründə də qoruya bilib.
Şah Abbasın erməniləri Naxçıvandan İsfahana köçürməsi sonralar Naxçıvanda demoqrafik vəziyyəti Azərbaycan türklərinin lehinə dəyişdi. Şah Abbas və onun nümayəndələri hər il milad bayramında erməni icmasını ziyarət edirdi.
11:03 07.01.2025
Oxunuş sayı: 6077
