Çin hakerləri ABŞ Maliyyə Nazirliyinin sanksiyalar idarəsini hədəf alıb
Çin hökumətinə bağlı hakerlər ABŞ Maliyyə Nazirliyinin iqtisadi sanksiyalara nəzarət edən ofisinə kiberhücum həyata keçirib. Bu barədə "Washington Post" məlumat yayıb.
Məlumata görə, Maliyyə Nazirliyinin bu həftə açıqladığı məktubda üçüncü tərəf kibertəhlükəsizlik xidmət təminatçısı "BeyondTrust" şirkətinin təhlükəsizlik sisteminin sındırıldığı və bir neçə işçi kompüterinin, eləcə də təsnif olunmamış sənədlərin əldə edildiyi bildirilib.
"Washington Post" ABŞ rəsmilərinə istinadən qeyd edir ki, hakerlər Xüsusi Maliyyə Sanksiyaları İdarəsini (OFAC), Maliyyə Araşdırmaları Ofisini və Maliyyə naziri Canet Yellenin ofisini də hədəf alıblar.
Maliyyə Nazirliyinin məktubunda bu insidentin “ciddi pozuntu” olduğu və təsnif olunmamış sənədlərin oğurlandığı qeyd edilsə də, təsirlənmiş istifadəçilər və ya departamentlər açıqlanmayıb.
Məqalədə vurğulanır ki, Çin hökuməti üçün əsas maraq sahələrindən biri ABŞ-ın maliyyə sanksiyalarına məruz qala biləcək Çin təşkilatları ilə bağlı məlumatların əldə olunmasıdır.
Çinin Vaşinqtondakı səfirliyinin sözçüsü Liu Pengyu bu ittihamları “əsassız” və “irrasyonallıq” kimi xarakterizə edib. Onun açıqlamasında Çin hökumətinin hər növ kiberhücumlara qarşı olduğu bildirilsə də, konkret hədəflərlə bağlı məlumatlara toxunulmayıb.
ABŞ Maliyyə Nazirliyi isə “Washington Post”un xəbəri ilə bağlı şərh verməyib.
Qeyd edək ki, Çin şirkətləri, fərdləri və qurumları ABŞ-ın xarici siyasətində sanksiyaların tez-tez tətbiq edildiyi hədəflərdən biridir. Keçən ay Maliyyə naziri Canet Yellen bəyan etmişdi ki, Vaşinqton Rusiyanın neft gəlirlərini azaltmaq və müharibəni maliyyələşdirmək imkanlarını məhdudlaşdırmaq üçün Çin banklarına qarşı sanksiyaları istisna etmir.
Bu kiberhücum, Çin dövlət dəstəyi ilə həyata keçirilən digər hücumlarla eyni vaxtda baş verib. Həmin hücumlarda ABŞ-ın ən böyük telekommunikasiya şirkətlərindən üçü də hədəf alınıb. “Salt Typhoon” adı verilən bu hücum zamanı cinayətkarlar qanunvericilərin telefon danışıqları və mesajlarına çıxış əldə ediblər.
Bu hadisələr ABŞ siyasətçiləri tərəfindən sərt şəkildə qınanıb. ABŞ, Çinlə bağlı bu cür təxribatların qlobal təhlükəsizlik və kiber sabitlik üçün ciddi təhdid təşkil etdiyini vurğulayır.
Nihat Tahirov
07:29 02.01.2025
Oxunuş sayı: 12830
