Azərbaycan kubokunun final görüşündə aksiya keçirilib
İİV-lə bağlı maarifləndimə geniş əhali arasında davam etdirilir Ölkə əhalisi arasında insanın immunçatışmazlığı virusu (İİV) əleyhinə maarifləndirmə işlərində məqsəd daha çox əhali qrupunun virusla bağlı məlumatla təmin edilməsi, mövcud informasiya səviyyəsinin artırılması, müayinələrə cəlbetmənin təşviqi və beləliklə, davamlı və keyfiyyətli profilaktikanın həyata keçirilməsidi.
Bununla bağlı məlumat verən “Hüquqi İnkişaf və Demokratiya” Vətəndaş Cəmiyyətinin İnkişafına Yardım İctimai Birliyinin sədri Zülfiyyə Mustafayevanın sözlərinə görə, bu tədbirlər zərərin azaldılması proqramları çərçivəsində və dövlət qurumları ilə əməkdaşlığa söykənərək həyata keçirilir: “Zərərin azaldılması proqramlarının tətbiqində, səhiyyə sahəsində profilaktika işlərinin həyata keçirilməsində, zərərli asılılıqlarla mübarizədə vətəndaş cəmiyyəti qurumlarının səhiyyə strukturları ilə dayanıqlı əməkdaşlığı mövcuddu. Hazırda İİV-lə mübarizədə əldə olunan ölkə nailiyyətləri qeyri-hökumət təşkilatlarının (QHT) əldə etdiyi bacarıqlarının və dövlət qurumları ilə bu sahədə qarşılıqlı əməkdaşlığının, dövlət siyasətinə dəstəyinin və ictimai töhvəsinin göstəricisidi”.
Qeyd edək ki, ölkəmizdə zərərin azaldılması proqramları 2006-cı ildən AİDS, Vərəm və Malyariya üzrə Qlobal Fondun (QF) dəstəyilə həyata keçirilir və proqramın əsas resipiyenti Səhiyyə Nazirliyidi. Bizim ölkədə həyata keçirilən profilaktik, müayinə və müalicə işlərinin nümunəsi qlobal formatda da müsbət qəbul olunur, çünki QF artıq illərdi, ölkəmizə bu sahədə maliyyə dəstəyi göstərir.
Profilaktikanın ən güclü tərəfi geniş əhali arasında aparılan maarifləndirmə tədbirləridi: “Məsələn, idman sahəsi, xüsusilə futbol geniş auditoriyaya malik olduğu üçün təşkilatımız belə tədbirlərdə İİV əleyhinə mesajların verilməsinə, insanların məlumatlılıq səviyyəsinin artırılmasına maraq göstərir. İndiyədək bir sıra idman qurumları təşkilatımıza kütləvi maarifləndirmə işlərində yardım edib. Bu tipli tədbirlərdə məqsəd daha çox əhali qrupunun virusla bağlı məlumatla təmin edilməsi, mövcud informasiya səviyyəsinin artırılması, müayinələrə cəlbetmənin təşviqi və beləliklə, davamlı və keyfiyyətli profilaktikanın həyata keçirilməsidi”.
QHT sədri əlavə edir ki, xüsusilə futbol tədbirlərində İİV əleyhinə mesajların verilməsinə və bununla da insanların məlumatlılıq səviyyəsi artmasına səy göstərirlər: “Bu xüsusda Azərbaycan Peşəkar Futbol Liqasının dəstəyini xüsusi qeyd etmək istəyirəm. Futbol üzrə Azərbaycan kubokunun final görüşündə, "Sabah" -"Zirə" futbol klublarının qarşılaşması zamanı, təşkilatımız Respublika QİÇS-lə Mübarizə Mərkəziylə (RQMM) birlikdə Palms Sport Arenaya toplaşan izləyiciləri İİV/QİÇS-lə bağlı informasiya materialları ilə təmin edib. Oturacaqların üzərinə bukletlər düzülüb, Arenanın fan zonasında maarifləndirici bannerlər quraşdırılıb. İzləyicilər paylanan bukletlər vasitəsilə İİV-ə yoluxma yolları, risk faktorları, İİV-ə müayinənin vacibliyinə dair ətraflı məlumat əldə edib. Fan zonada azarkeşlərin sualları cavablandırıb. Bundan başqa, final görüşü zamanı stadiondan oyunun şərhi zamanı, keçirilən aksiya barədə məlumat açıqlanıb, azarkeşlərə İİV barədə qısa məlumat verilib, bu virusla birgə mübarizənin və müayinənin əhəmiyyəti vurğulanıb. Ümumillikdə aksiya 7045 nəfəri əhatə edib və RQMM əməkdaşları, könüllülər iştirak edib”.
21:46 15.05.2026
Oxunuş sayı: 13
