Qazaxıstan narazıdır: dəniz terminalına hücum ciddi risk yaradır
Qazaxıstan Energetika Nazirliyi Kaspiy Boru Kəməri Konsorsiumunun (KTK) Novorossiysk limanı yaxınlığındakı dəniz infrastrukturuna edilən hücumla bağlı rəsmi açıqlama yayıb.
Crossmedia.az xarici KİV-ə istinadən xəbər verir ki, 29 noyabr tarixində pilotsuz su vasitələri tərəfindən həyata keçirilən hücum nəticəsində KTK-nın VPU-2 adlı xarici yanalma qurğusu ciddi zədələnib. Qurumun fəaliyyətinin tam bərpası üçün genişmiqyaslı təmir-bərpa işlərinə ehtiyac olduğu bildirilir.
Nazirlik bəyan edib ki, mülki və kritik enerji infrastrukturlarına qarşı bu kimi hücumlar qəbuledilməzdir. Qeyd olunub ki, KTK beynəlxalq enerji layihəsi olduğu üçün ona qarşı hərbi təsirlər qlobal enerji təhlükəsizliyi üçün birbaşa risk yaradır və konsorsiumun bütün iştirakçılarının, o cümlədən Qazaxıstanın iqtisadi maraqlarına ciddi zərər vurur.
Nazirlik əlavə edib ki, mənfi təsirlərin minimuma endirilməsi və iri yataqlarda hasilat tempinin qorunması məqsədilə neftin alternativ ixrac marşrutlarına təcili yönləndirilməsi planı aktivləşdirilib.
Bildirilib ki, “situasiya Qazaxıstan hökumətinin xüsusi nəzarətindədir”.
Türkan Kərimli
19:55 29.11.2025
Oxunuş sayı: 1005
